Дуф Водопад
Во долината на реката Радика, во реканскиот крај, во подножјето на планината Дешат, во националниот парк Маврово, е сместено планинското село Ростуше, во чија непосредна близина се наоѓа природната реткост и убавина - Дуф водопад. Она што овој водопад го прави посебен и го издвојува од останатите водопади е висината на карпата од која паѓа водата. Паѓајќи водата од таа висина создава неверојатен звук и глетка која потсетува на нешто многу моќно и грандиозно. Природата прави чуда, па така го створила и овој Дуфски водопад. На пролет сликата на водопадот и чувствата кои ги предизвикува кај посетителите се многу поголеми и по реални. Овој феномен настанува со топењето на снегот, водата надојдува и е скоро за дупло повеќе зголемена од вообичаено ниво, па така се добива многу поимпресивно чувство.
Тој претставува ерозивен водопад кој е создаден како последица на регресивното всекување на речното корито на Ростушка Река. Според геолошката структура, најзастапени се карбонатните карпи. Вкупниот вертикален отсек на Дуф Водопад изнесува 23,5 м, а подинскиот дел содржи џиновски лонец. Дуф Водопад е полноводен во текот на целата година, при што протокот е двојно поголем во текот на зимата, а во просек изнесува околу 90 л/с.
Дуф Водопад - патешествие покрај природни реткости
Водопадот се наоѓа на леснодостапно место и за да се дојде до него не е потребен голем физички напор. До него води обележана пешачка патека во должина од илјада и дваесет метри. Доколку се пешачи со просечно темпо, до водопадот се пристигнува за половина час. Од половина пат, патеката води по кањонот на Ростушка Река, кој на некои места е длабок и до 100 метри. На крајот од кањонот се наоѓа Дуф Водопад, скриен позади карпите, со висина над 28 метри. На местото е поставена алпинистичка опрема со која посетителите може да се искачат по карпите што го обиколуваат водопадот. Луѓето го посетуваат Дуфскиот водопад и околниот регион и се разладуваат од завесата од капки која како дожд ги испушта водата паѓајќи по должината на Дуф Водопад.
Повеќе информации за водопадот Дуф на следнава страна.