Шарена џамија
Најпрепознатливиот белег на Тетово, но и една од најубавите градби во Македонија претставува – Шарената џамија. Лоцирана е во стариот дел од Тетово, на десната страна на реката Пена. Според некои истражувачи, датира од 1495 година, а според други подигната е во 1564 година.
Натписот над влезната врата открива дека нејзината сегашна форма потекнува од првата половина на 19 век, кога била обликувана врз темелите на друг постар објект. Позната е и како Пашина џамија, по Абдурахман-паша, кој бил турски феудален господар во Тетовскиот пашалак и кој вложил средства за надградбата и за проширувањето.
Овој религиозен објект е уникатен по својата убавина и неслучајно е сместен во антологиите на исламската архитектура. Се одликува со еднопросторна квадратна градба, која комбинира барокен и неокласичен османлиски градежен стил.
Заслужни за уникатните и живописно насликаните орнаменти се искусни мајстори од Дебар. На источната, северната и јужната фасада во четири реда се насликани вертикално поставени правоаголни полиња во фреско техника, а посебно впечатлива е јужната страна свртена кон главниот пат за Гостивар.
Особено внимание привлекува претставувањето на Мека, што е редок и веројатно единствен пример на ликовно претставување на ова светилиште на територијата на југоисточна Европа.
Ѕидната декорација во внатрешноста, живописните геометриски и билни орнаменти и фасадите на Шарената џамија ги содржат карактеристиките на турската традиционална декорација, така што, кога ќе ја посетите, за миг силно ќе ве заблесне архитетектонскиот рашкош на некогашната моќна Отоманска Империја.
